[新聞] 「轉貼」《笑傲缸湖》數碼通獲瑞信封「電訊狀元」，香江電訊望「重考」？

octopusman

《笑傲缸湖》睇消委會嘅《選擇》月刊，定期都會做下全港各大網絡商嘅質素測試，等一眾消費者可以透過一個「不涉利益」嘅第三方，去了解一下邊個網絡商質素最好。唔單止消委會，連大行都要叉埋一隻腳要做測試，最近瑞信就出咗報告為各大本地電訊商打分。

講到要打分，就好似文憑試放榜一樣，有人歡喜有人愁。得到最高評分嘅係數碼通（00315），六科（六個不同分類項目比較），有三科拎到5**滿分，總分27分成為「電訊狀元」。次名嘅係和記電訊（00215），一樣係有三科拎滿分，不過總分只係有25。

文憑試放榜媒體大多係「跟紅頂白」，個個擁晒去狀元身邊尋找「鑿壁偷光」嘅勵志故事。不過電訊商放榜就比較多缸湖人關心邊個係「包尾大幡」，事關日後續約都盡可能避免唔用呢間公司。而今次瑞信放榜，包尾嘅就係小小超旗下嘅香江電訊（06823），總分得18分，大部分項目評分只係得3分。報告仲話佢無論係覆蓋同埋速度都係最低。而香江電訊就解釋，話測試期間正進行緊4G網絡升級，所以評分係未反映真實表現喎。唔知學生成績唔好，可唔可以同考評局講：「我當時進行緊腦部系統升級，所以成績未能反映真正實力」呢？《任盈盈》

資料來源︰按此