標題: [數碼通] 「轉貼」Executive日記—— 錯過買蘋果 勁賺補番數 黎總有福依然在 [打印本頁]

---

作者: octopusman    時間: 2012-12-24 17:43     標題: 「轉貼」Executive日記—— 錯過買蘋果 勁賺補番數 黎總有福依然在

平日食飯搭車搭船，見到唔少人都係「頭耷耷」睇手機，最開心嘅一定係電訊商。Kelly早兩日喺怡東飲完茶，撞見數碼通總裁黎大鈞，自然就講吓電訊業發展，佢話○八年已睇好蘋果手機，好後悔當年無買到股票，賺少好多。但Kelly覺得，黎總「塞翁失馬，焉知非福」，雖然無買蘋果股票，佢自己公司能捕捉熱潮賺大錢，佢份人工三級跳，乜都補番晒啦。

Kelly見到黎大鈞，第一時間恭喜佢成為電訊界打工皇帝，佢間公司，舊年盈利創新高賺逾十億元，身為總裁嘅佢，酬金亦勁升，由一千三百多萬元，暴升至三千四百幾萬元，真係恨死好多打工仔。黎總就話，智能手機發展係大勢所趨，只係睇吓邊間電訊商夠本事「食得應」個市場。

後悔無買蘋果股票

佢仲話，早喺○八年已睇好蘋果手機，嗰陣時已好想掃蘋果股票，但因事忙，最終不了了之，大歎走寶。

Kelly記得，當年蘋果股價約一百美元，四年間，一度飆升至七百美元，成為全球市值最高嘅上市公司，𠵱家雖回落至約五百美元，但如果由○八年持股至今，都好和味。

不過，Kelly就覺得，佢雖然無買蘋果股票，但自己本行做得好，公司發畀佢嘅花紅，相信可彌補唔少啦。

資料來源︰按此

---

歡迎光臨 電訊茶室 (http://telecom-cafe.com/forum/)

Powered by Discuz! 7.2